كلمات اغنية "مساومات" مسار اجباري

أول دكتور تطعيم
إداني ميدالية هدية
علشان تشميرة كُم
وأنا كنت بأساوم أمي
تديني فلوس من جيبها
لهدية عيد الأم
وساومت سلالم بيتنا
إن أنا مش هاجري عليها
وقصادها ما تتعبنيش
و ساومت كتير دكتوري
علشان يكدب على والدي
و يقوله ابنك هيعيش
وساومت الموت على حاجة
ومفيش داعي إني اذكرها
علشان ما اخلفش الوعد
وساومت الحب الأول
إن أنا مش هاعرف غيرها
علشان نفضل مع بعض
و ساومت الحزن بضحكة
و ساومت الضحكة بوحدة
و ساومت الوحدة بواحدة
و ساومت الواحدة بشك
وكبرت شوية ولقيتني
قضيت عمري مساومات
علشان مهتم بحاجة
بتضيع قدامها حاجات
وساومت فلاش الكاميرا
إن أنا هاضحك ويطلع
الصورة بدون أحزان
ووعدت اللون الأسود
يفضل دايما أقرب لي
من زغللة الألوان
وساومت الذكرى إياها
أفضل عايش جواها
و تعلِمني النسيان
وساومت صحابي عليا
على قد ثقتهم فيا
أفضل نفس الانسان
في مسافة مابيني وبينك
أنا مش ماشي فشرايينك
كان ممكن أساومك لكن
صورتي هتتهز فى عينيكي
وكبرت شوية ولقيتني
قضيت عمري مساومات
علشان مهتم بحاجة
بتضيع قدامها حاجات