كلمات اغنية "قطر الحياه" أحمد مكي

فى كل لفة عقرب ساعة عمرى بيتسرسب بيعدى الناس في الدنيا بتتغيرحتى الحديد بيصدى
وانا الوحيد واقف مكانى ثابت فى ناس اختارت سكة صابت ناس تانية اختارت سكة خابت
احساس قاسـى وصعب لما الناس تشوفك فاشل ابوك وامك واخواتك واصحابك شايفينك عاطـل قوم يابنى اسعـى وحاول والله غلبت احـاول ياما حاولت وقبل الجون ما ييجى يطلع فـاول
معنديش مهارة وحتى كوسة وحوستى حوسة ودوست بعد اخر البنزين بدوسة فى كل مقابلة شغلانة يتقلى لف نفسك بشهادتك مدد بجنب اى حيط وخدلك بوسة
رجعت فلاش باك حسبت سنين عمرى تلاتين سنة لقيت حسبت تانى وتالت واتخضيت
ببص فى المراية كام شعراية بيضة لقيت وابويا هو اللى لسه بيصرف ع البيت
بتعامل من عيلتى على انى عالة وحالتى حالة ثقتى بنفسى راحت النجاح بقى استحالة

نفسى اهرب من نفسى و من حالتى ومن عيلتى ومن الدنيا نفسى القى دنيا تانية اهرب ليها لو حتى ثانية وفى يوم قلهالى صاحبى واللى يدلك على الطريق ميفدش الصاحب غير صاحبه اسمع من الصديق
قالى فى قعدة ضرب حلوة بليل عاملنها سألته هاش ضحك قالى بيسة قولتله لدمنها

قالى متخفش مش ممكن تدمن من اول شكة اقنعنى... بليل فعلا شكيتلى اول شكة مفصلى ساحت وارتاحت وروحى راحت بكلم نفسى من جوه برغى من بره ساكت همومى شبه تاهت والرؤية باهت فى باهت
كل مشكلة كانت عندى فى الدنيا ماتت وتاهت

عدت ساعات فى ثانية لقيت الصحبة قايمة دخلت بيتى وش الفجر عيلتى كانت نايمة
دفنت نفسى تحت الباطنية جسمى متلج نمت فى أقل من ثانية نومة واحد متبنج

قطر الحياة بيعدي بسرعة سنة فى سنة فى سنة وانا زى ما انا من لما كان عندى سنة
هى هى الحياة هو هو انا انا زهقت طهقت من الحياة تقدر تقول مليت أنا

صحيت وكنت رجعت تانى للواقع والعكننة عدى النهار بطىء كأنه كان شهر وسنة
نفسى النهار يعدى بسرعة واضرب تانى ارجع ملك زمانى بعيد عن العالم اللى رمانى
خلونى اضرب معاهم كل يوم وبتعزم خلاص دخلت السكة والطريق بيترسم
فاجئنى صحبى فى يوم قلهالى فى وشى خف تعوم اجيب فلوس منين ليا وليك نضرب كل يوم
شخشخ جيبك يا من اعدتنا دى تكون محروم من النهارده مفيش ضرب ببلاش مفهوم مفهوم

روحت وتانى يوم فى ميعاد الضرب جسمى اتكهرب كرابيك فى ضهرى ومناخيرى سايلة وبتسرب
عاوز اضرب منين اجيب فلوس منين اجيب فلوس بدأت استلف من كل اللى اعرفه وادوس
وحتى اخواتى خت منهم ياما فلوس دروس كله كرهنى وبيهرب منى تقلت ع النفوس
خمسين جنيه فى خمسين فى مية فى مية بسرق يوماتى فلوس من البيت وكلو شك فيا
نزلت بعت كل حاجة جتلى فى يوم هدية خلصت فلوسى لحد فى يوم ما جتلى فكرة هيا؟ هيا؟

دهب امى موبيل اختى لاب توب اخويا سرقتهم نزلت اهرب من البيت وقفنى ابويا
حاول يمنعنى مسكنى من ايدى جامد زقيته اتخبط فى الحيط و بصلى ازاى ابنه واذيته
خد منى كل حاجة وتربس الباب غضب ساعتها طلبت اغرب حاجة ممكن تتطلب
عاوز فلوس حالا يا اما هرتكب جريمة اتهمنى بالجنون وادانى كام شتيمة
بيبان كل الاوض بتتفتح عيلتى بتتفرج لسه بيستوعبوا يمكن ده جد يمكن بيهرج

سحبت بنت اختى تلت سنين ناحية شباك هاتوا الفلوس لارميها فجأة زاد الارتباك
امى بكت بحرقة ادامى فوقت لثوانى رمتلى فلوس وبصوت عالى مشوفش وشك تانى
امشى ملكش ام يا ابغض من شيطانى خدت الفلوس وجريت عارف مش راجع بيتى تانى

قطر الحياة بيعدى بسرعة سنة فى سنة فى سنة وانا زى ما انا من لما كان عندى سنة
هى هى الحياة هو هو انا انا زهقت طهقت من الحياة تقدر تقول مليت أنا

خسرت كل أهلى وصحابى بقيت وحيد ومنين هجيب فلوس لازم القى طريق جديد
فجأة افتكرت جار من سنى ساكن لوحده طول عمره ابوه فى اعارة بره مصر وشهرى فلوس يبعتله
شديته زى ما اتشديت انا لنفس الطريق لقيت مصدر فلوس جديد وبيت ولقيت صديق
نضرب سوا بفلوسه وفى بيته ملناش ظهور شقى سنين ابوه خلص كله فى اربع شهور
وفى ليلة بنضرب جاتله مكالمة مصدقهاش ابوه عرف ان ابنه بيسرقه واتنقل انعاش
كل عصب فى جسمى اتوتر زودت الجرعة اكتر الجرعة المعتادة خلاص مبقتش تأثر

شريط حياتى بيتعرض ادامى اخبر فى اخبر ضربت سم فى عروقى زودته اكتر واكتر
نفسى افنى واخلص من الدنيا زى المية اتبخر كمان زودت سنه جسمى كلو اتلون اصفر
صاحبى اتفزع قام واتسرع مالك اصفر ليه يا جدع جسمك عرقان وبتترعش زى اللى من الحية اتلدع
رغم انى غرقان فى العرق جسمى متلج موجوع وجع من خضتى جيت اصلب طولى جسمى ع الارض اترزع
جسمى رافض لكل امر منى القوة اتهدت والدنيا بتضلم تدريجى واحدة واحدة اسودت
اخر لقطة فى حياتى شوفتها كانت مأساة صاحبى مرعوب وبيراقب فراقى للحياة

قطر الحياة بيعدى بسرعة سنة فى سنة فى سنة وانا زى ما انا من لما كان عندى سنة
هى هى الحياة هو هو انا انا زهقت طهقت من الحياة تقدر تقول مليت أنا

عمري بسرعه انتهي رجعت شريط حياتي ملقتش في حاجه عدله تتذكرلي عملتها
حياتي راحت مني كلها ضيعتها ندمان عل كل لحظه غامقه في يوم انا عشتها
يارب اديني فرصه تاني ارجع للحياه همشي في طريقي صح لحد اخر منتهاه
دي حاجه صعبه فعلا انك تختفي م الدنيا والناس مبتفتكركش بحاجه حلوه لوجه الله